На парламенцкіх выбарах у Румыніі перамагаюць праеўрапейскія партыі
Парламенцкія выбары ў Румыніі / EPA
На парламенцкіх выбарах у Румыніі перамагаюць праеўрапейскія партыі, якія выступаюць за далейшую падтрымку Украіны. Папярэднія даныя сведчаць, што яны змогуць сфармаваць урад. Сацыял-дэмакратычная партыя Румыніі набірае 22,57%, ліберальная апазіцыйная партыя "Саюз выратавання Румыніі" — 12,14%, Нацыянал-ліберальная партыя (яна ўваходзіць у цяперашнюю правячую кааліцыю) — 14,39%.
Ультраправы "Альянс за аб'яднанне румын" займае 2-е месца, у яго 18,17% галасоў. Іншыя ультраправыя партыі — "SOS Румынія" і "Партыя маладых людзей" — набіраюць 7,23% і 6,34% галасоў адпаведна. Дэмакратычны саюз венграў Румыніі атрымлівае 6,45%. Каб трапіць у парламент, партыя павінна набраць 5%.
Парламенцкія выбары ў Румыніі прайшлі праз тыдзень пасля таго, як у другі тур прэзідэнцкіх выбараў нечакана выйшаў правапапулісцкі кандыдат Калін Джарджэску, нагадвае newsmaker.md. Гэта стала шокам для многіх палітыкаў, экспертаў і грамадзян.
Апанент Джарджэску ў другім туры — лідарка Саюза выратавання Румыніі, былая журналістка, а цяпер мэр горада Кымпулунг Алена Ласконі. Яе партыя пазіцыянуе сябе як трэцяя палітычная сіла краіны. Ласконі прытрымліваецца праеўраатлантычных поглядаў.
Галасаванне ў другім туры адбудзецца 8 снежня.
