На Пуціна падалі заяву ў Следчы камітэт за рэабілітацыю нацызму

Палітык з Удмуртыі Сяргей Антонаў падаў у Следчы камітэт Расіі заяву на Уладзіміра Пуціна. Апазіцыянер, які пакінуў Расію ўлетку 2022 года, патрабуе праверыць словы Пуціна на прадмет рэабілітацыі нацызму, піша "Idel.Реалии".

Гаворка ідзе пра выказванні расійскага кіраўніка падчас інтэрв'ю амерыканскаму журналісту Такеру Карлсану. Ён заявіў, быццам "палякі загуляліся і вымусілі Гітлера пачаць Другую сусветную вайну".

"Чаму пачалася вайна 1 верасня 1939 года менавіта з Польшчы? Яна была незгаворлівая. Гітлеру нічога не заставалася пры рэалізацыі яго планаў пачаць менавіта з Польшчы", — паведаміў Пуцін.

Антонаў мяркуе, што такім чынам Пуцін адмаўляе факты, выяўленыя Міжнародным ваенным трыбуналам у Нюрнбергу. Таксама ён звяртае ўвагу, што Пуцін "учыніў гэтае злачынства пры абцяжваючых абставінах": распаўсюдзіў інфармацыю з выкарыстаннем свайго службовага становішча і праз сродкі масавай інфармацыі.