Офіс Ціханоўскай заклікае беларусаў адмовіцца ад паездак у ААЭ
Аэрапорт у ААЭ / pixabay.com
Юрыдычная каманда офіса Святланы Ціханоўскай па прававых пытаннях заклікае беларусаў адмовіцца ад паездак у Аб'яднаныя Арабскія Эміраты "па любых прычынах — асабліва калі вы асцерагаецеся палітычна матываванага пераследу на радзіме". Таксама яна рэкамендуе "не разглядаць аэрапорты гэтай краіны ў якасці транзітнай перасадкі".
Справа ў тым, што паміж урадамі РБ і ААЭ падпісана пагадненне "аб супрацоўніцтве ў галіне бяспекі і процідзеяння тэрарызму".
"Паводле апошняга дакладу праваабарончай арганізацыі Amnesty International, ААЭ актыўна выкарыстоўваюць у нацыянальнай практыцы затрыманні і арышты нязгодных грамадзян, — піша юрыдычная каманда офіса Ціханоўскай. — Акрамя таго, дзяржава працягвае трымаць палітычных зняволеных у турмах на падставе нацыянальнага рэпрэсіўнага закона, які дазваляе бестэрміновае "кансультаванне ў пытаннях барацьбы з экстрэмізмам". Такім чынам, не выключана, што грамадзяне Рэспублікі Беларусь таксама могуць быць затрыманыя ў ААЭ "для кансультацый" і далей выдадзены ў Беларусь".
