Пад петыцыяй за прысваенне беларусу звання Героя Украіны сабралі 25000 галасоў

Пад петыцыяй за прысваенне загінуламу беларускаму добраахвотніку Дзмітрыю Рубашэўскаму звання Героя Украіны на сайце ўкраінскага прэзідэнта сабралі патрэбныя галасы — 25 тысяч. Рубашэўскі ("Ганс") загінуў 12 красавіка 2022 года падчас баёў з расійскімі акупантамі ў Луганскай вобласці. Яму было 30 гадоў. Ён быў байцом 24-й механізаванай брыгады Узброеных сіл Украіны. Беларуса ўжо пасмяротна ўзнагародзілі ордэнам "За мужнасць" III ступені.

Дзмітрый Рубашэўскі нарадзіўся ў Брэсце. Ва Украіне ваяваў з 2015 года, меў некалькі раненняў. У 2019 годзе ў баях страціў вока. Пасля ранення яго даглядала сястра загінулага таварыша. Пазней яна стала яго жонкай, у пары нарадзілася дачка. Рубашэўскі жыў у Львоўскай вобласці.

Аўтары петыцыі на імя прэзідэнта Украіны Уладзіміра Зяленскага просяць прысвоіць званне Героя Украіны і загінуламу беларускаму добраахотніку Эдуарду Лобаву. Але патрэбная колькасць галасоў яшчэ не сабраная.

Калі экспертная група дасць станоўчую рэзалюцыю, справу аб прысваенні Дзмітрыю Рубашэўскаму звання Героя Украіны разгледзіць Зяленскі.

Вясной 2022-га пасмяротна званне Героя Украіны атрымаў беларус Аляксей Скобля ("Тур"). Ён служыў ва ўкраінскім спецназе, загінуў 13 сакавіка, абараняючы Кіеў — прыкрываў адыход сваіх байцоў. Яшчэ раней званне Героя Украіны атрымаў беларус Міхаіл Жызнеўскі, які загінуў у 2014-м падчас рэвалюцыі ў Кіеве.