Падчас фэста SPRAVA выступяць аркестры і гурт "Троіца", а гледачы пабудуюць пляж

4-5 жніўня ў вёсцы Белая Царква, што ў Віцебскай вобласці, пройдзе другі фестываль SPRAVA. У лайнапе фестывалю — больш за 10 гуртоў і артыстаў, некалькі класічных аркестраў і тэатраў. Хэдлайнерамі стануць беларускае этна-трыа "Троіца" і беларуска-польскі этна-джаз-квінтэт Ulyanica.

Арганізатары нагадваюць, што SPRAVA — гэта міжнародны фестываль-узаемадзеянне з гістарычным і прыродным ландшафтам Беларусі сродкамі сучаснага мастацтва і музыкі.

Фестываль аб'ядноўвае архітэктараў, гісторыкаў, мастакоў, рамеснікаў, музыкаў і наведнікаў дзеля пабудовы невялікіх архітэктурных аб'ектаў вакол Чарэйскага возера, на якім знаходзяцца вёскі Чарэя і Белая Царква. У стартавым 2017-м годзе была пабудаваная фестывальная сцэна, якая выкарыстоўваецца для канцэртаў і лекцый, а па-за падзеямі — як месца адпачынку.

Галоўнай будаўнічай падзеяй SPRAVA сёлета стане стварэнне незвычайнага пляжа. Да берага будзе прышвартаваная пабудаваная падчас травеньскай міжнароднай школы архітэктуры SESAM 2018 Ex Nihilo плывучая платформа PLATFORMIX, на якой адбудуцца выступы класічных музыкаў. Акрамя таго, беларускія мастакі ўзвядуць некалькі малых лендарт-аб'ектаў у прахалодным дубовым гаі паўвострава.
 
Як і летась, любы ахвочы зможа зрабіць сваімі рукамі зэдлік, столік ці іншы невялікі драўляны аб'ект пад кіраўніцтвам дасведчаных сталяроў з Германіі і Беларусі і даведацца пра старажытную еўрапейскую традыцыю вандроўных сталяроў.
 
Для дзяцей і дарослых праект "Дыяфільмы live" рыхтуе паказ дыяфільмаў, ужывую агучаных акторамі і музыкамі, а тэатр "Картонка" Святланы Бень пакажа свой новы спектакль. Фатограф Максім Шумілін правядзе пленэр па плёначнай фатаграфіі. Акрамя таго, у праграме фестывалю майстар-класы ад "Торба Шоу", "Мыльны фальварак", арт-студыя PLASTILIN і многае іншае.

Падчас спецыяльнай экскурсіі наведнікі фестывалю змогуць пазнаёміцца з гісторыяй земляў, што калісьці належалі Сапегам і Мілашам, а аматары прыроды даведаюцца пра асаблівасці мясцовай флоры і фаўны на прагулцы па экасцежцы.
 
На палявой кухні за сімвалічную цану можна будзе пакаштаваць здаровую і смачную ежу ад прафесійных кухараў. І, вядома, на фудкорце не абыдзецца без любімых наведнікамі французскіх слімакоў і брыёшаў Барыса Поль-Жоржа Буаняра.
 
Арганізатары фестывалю адзначаюць, што ўсе актыўнасці будуць бясплатныя для наведнікаў.

"Першы фестываль SPRAVA паказаў, што паўвостраў ў Белай Царкве — месца сілы не толькі для нас, жыхароў вёскі. Шмат актыўных і творчых людзей хочуць укласці ў гэтую прастору сваё натхненне і веды. Мы збіраемся падтрымліваць гэтую традыцыю, таму сёлета SPRAVA пройдзе пад дэвізам "Фестываль месца", дзе любы ахвочы можа стаць не толькі наведнікам, але і актыўным удзельнікам", — кажуць арганізатары Каця Аверкава і Мацвей Сабураў.

Маніфест фестывалю SPRAVA

Часам здаецца, што месца пакінутае людзьмі. Гэта нядрэнна выглядае і настройвае на філасофскі лад. Як выяўляецца нашая прысутнасць там, дзе мы жывем?
 
Мы вырашылі прысутнічаць праз справу. Гледзячы на руіны аднаго з першых у Беларусі ўніяцкіх храмаў, створанага, каб аб'ядноўваць, мы аб'ядналіся з іншымі мясцовымі жыхарамі і на ціхім паўвостраве пасярод возера, справа ад рэдкага ранняга барока, задумалі фестываль. Фестываль SPRAVA.
 
Узяўшы ў рукі малаткі і рэха сучаснага мастацтва з сабой, у вясковую пастараль, мы ідзем па тонкай грані паміж стваральным умяшаннем і высакароднай бяздзейнасцю, якія дазваляюць рэчам быць, рыбам — плыць, а травам — пахнуць.
 
Увогуле, мы крыху паправім, аформім і агучым асяроддзе, а вы далучайцеся. Будзе драўляна, экалагічна і пранікнёна.
 
SPRAVA — гэта вопыт узаемадзеяння з прыродным і культурным ландшафтам сродкамі сучаснага мастацтва, рамёстваў і музыкі.
 
SPRAVA — гэта спосаб асэнсаванага ўключэння сябе ў сераду.
 
SPRAVA — гэта падстава атрымаць асалоду ад унікальнасці прасторы, атмасферы і зносін удалечыні ад паўсядзённага гарадскога жыцця.
 
SPRAVA — гэта магчымасць паглядзець на чужую працу і, магчыма, пачаць сваю.

6 чэрвеня ў 15.00 арганізатары фэста Каця Аверкава і Мацвей Сабураў стануць  гасцямі жывога эфіра Еўрарадыё. Задавайце пытанні!