Падтрымка дзяржапарату і канкрэтны графік: як ЗША будуць працаваць з дэмсіламі

23/03/2023 - 06:50

Пашырэнне супрацоўніцтва — вотум даверу дэмсілам Беларусі, кажуць у ЗША / калаж Улада Рубанава, Еўрарадыё

Пашырэнне супрацоўніцтва — вотум даверу дэмсілам Беларусі, кажуць у ЗША / калаж Улада Рубанава, Еўрарадыё

Пра новы фармат супрацоўніцтва дэмсіл з ЗША абвесціла намеснік дзяржсакратара ЗША Вэндзі Шэрман на сустрэчы са Святланай Ціханоўскай 22 сакавіка.

Гэта прадугледжвае "ўсебаковы стратэгічны дыялог паміж урадам ЗША і беларускімі дэмакратычнымі сіламі", расказаў журналістам прадстаўнік амбасады ЗША.

— Да гэтага адносіны паміж дэмакратычнымі сіламі, хай гэта будзе Ціханоўская, хай гэта будзе Каардынацыйная рада або Кабінет, мелі нефармальны і нерэгулярны характар.

З канца 2023 года сустрэчы стануць сталымі і нават з'явіцца "канкрэтны графік".

— У гэтым дыялогу возьмуць удзел адпаведныя ведамствы ўрада ЗША, якія займаюцца Беларуссю. І прадстаўнікі беларускіх дэмакратычных суб'ектаў, уключаючы палітычных лідараў, прадстаўнікоў грамадзянскай супольнасці і акадэмічнай супольнасці.

Дыскусіі будуць ахопліваць тэмы, якія ўяўляюць сабой узаемную цікавасць. У тым ліку падтрымку беларускай грамадзянскай супольнасці і незалежных СМІ перад абліччам прыгнятальных рэпрэсій, зменлівы характар умоваў бяспекі Беларусі і вакол яе ў кантэксце вайны Расіі ва Украіне. Міжнародныя эканамічныя санкцыі, накіраваныя супраць рэжыму Лукашэнкі за парушэнне правоў чалавека і працяг саўдзелу ў вайне Расіі супраць Украіны…

Гэта [дыялог. — Еўрарадыё] прыкмета глыбіні партнёрства Злучаных Штатаў з дэмакратычнымі сіламі, моцны вотум даверу з боку Злучаных Штатаў у дачыненні да патэнцыялу самаадданасці і намаганняў дэмакратычных сіл, — працягвае прадстаўнік ЗША.

Якія меры будуць абмяркоўвацца, напрыклад, з прычыны рэпрэсій у Беларусі, шмат у чым залежыць ад дэмсілаў, адзначае спікер.

— Усе ведамствы дзяржаўнага апарату ЗША будуць аказваць тую падтрымку, у якіх яны [прадстаўнікі дэмсілаў у сваёй працы. — Еўрарадыё] маюць патрэбу. Гэта значыць дыялог будзе залежаць ад іх, якія пытанні яны прадставяць у часе гэтых размоў. І мы, вядома, будзем гатовыя дапамагаць.

Візіт Святланы Ціханоўскай у ЗША праходзіць 21-28 сакавіка. Гэта яе трэцяя паездка ў Амерыку пасля выбараў 2020 года. Плануецца, што Ціханоўская сустрэнецца з высокапастаўленымі чыноўнікамі ЗША. Сярод іх — намеснік дзяржсакратара Вэндзі Шэрман, памочнік дзяржсакратара па Еўропе Карэн Донфрыд, дарадца Джо Байдэна па нацыянальнай бяспецы Джэйк Саліван, спікер палаты прадстаўнікоў Кангрэса ЗША Кевін Макарці і іншыя.

25 сакавіка Ціханоўская паўдзельнічае ў мерапрыемстве ў гонар Дня Волі ля Белага дома. Яе таксама запрасілі выступіць на слуханнях у Камітэце Сената па міжнародных адносінах.

Разам з Ціханоўскай у ЗША прыбылі прадстаўніца кабінета па сацыяльных пытаннях Вольга Гарбунова і прадстаўніца па нацыянальным адраджэнні Аліна Коўшык. У Гарбуновай запланаваныя сустрэчы з прадстаўнікамі Дзярждэпартамента па шэрагу тэм, уключаючы правы чалавека. Коўшык сустрэнецца з афіцыйнымі асобамі, якія працуюць над пытаннямі адукацыі і культуры, пытаннямі Халакосту і процідзеяння дэзінфармацыі.