"Пакажы кашалёк, Вячорка": дэмсілы павінны справаздачыцца, але не перад усімі

— Таму, ці ёсць у Офіса абавязак гэта рабіць? Думаю, што няма. Яны павінны гаварыць пра тое, у чым канкрэтна іх роля. Ці сапраўды яны размяркоўваюць гранты? Наколькі мне вядома, не. Яны павінны пра гэта гаварыць празрыста. Як яны фінансуюцца з пункту гледжання куплі камп'ютараў у офіс, мне здаецца, гэта іх асабістая справа. Калі яны знайшлі ахвярадаўцаў, якія, можа быць, не хочуць, каб пра гэта ведалі, гэтыя людзі маюць права на ананімнасць.

Сітуацыя вельмі нелінейная. Гэта [фонды і прадстаўнікі дэмсіл. — Еўрарадыё] не людзі, якія за нашы падаткі жывуць, каб кожны з нас мог прыйсці і сказаць: "Пакажы мне свой кашалёк, Франак Вячорка". Калі такія запыты ёсць, іх шмат апошнім часам, значыць, любому чалавеку, якому такія пытанні адрасуюцца, не перашкодзіла б празрыста паказаць, што ён можа паказаць. А далей зразумелай мовай растлумачыць, чаму публікацыя ўсіх звестак, у тым ліку пра ахвярадаўцаў, гэта наогул не ў інтарэсах усіх.

Калі так растлумачыць, вы не прыбераце ўвесь хэйт, але людзі разумныя, прынамсі, не будуць купляцца на дэмагогію тых, хто проста хоча зняць Ціханоўскую, — робіць выснову Арцём Шрайбман.