Паслоў Беларусі і Расіі не запрасілі на памятныя мерапрыемствы ў Японіі

Улады японскага горада Нагасакі вырашылі зноў не запрашаць паслоў Расіі і Беларусі на памятную цырымонію ў Парку міру на дзень атамнай бамбардзіроўкі ў Нагасакі. Пра гэта заявіў на прэс-канферэнцыі мэр горада Шыра Судзукі, піша yomiuri.co.jp.

"З улікам канфлікту ва Украіне, змяняць гэта планаў няма", — сказаў мэр, калі яму нагадалі, што летась расійскі і беларускі паслы не былі запрошаныя. Прычынай была вайна, якую развязала Расія і падтрымала Беларусь.

Цырымонія памяці ахвяр атамнай бамбардзіроўкі Нагасакі праходзіць кожны год у гадавіну трагедыі 9 жніўня. У гэтым годзе мяркуецца, што на цырымоніі будзе прысутнічаць 2400 гасцей, сярод якіх замежныя паслы, прадстаўнікі міжнародных арганізацый і гараджане.