Распрацоўшчыкі "танчыкаў" сабралі больш за 1 млн долараў на "хуткія" для Украіны
Цацачныя салдацікі, ілюстрацыйнае фота / mwi.westpoint.edu
Дабрачынны праект Wargaming United сабраў больш за мільён долараў, якія перададуць украінскім медыкам, піша espreso.tv са спасылкай на віцэ-прэм'ер-міністра лічбавай трансфармацыі Украіны Міхаіла Фёдарава.
"Стваральнікі легендарнай гульні World оf Tanks сабралі $1+ млн на хуткія для Украіны", — напісаў ён.
Гульцы "танчыкаў" і іншых праектаў Wargaming купілі ў гульнях 90 тыс. дабрачынных набораў на агульную суму 1,074 млн долараў.
"Усе сродкі пералічаць праз UNITED24 на закупку рэанімабіляў, якія будуць ратаваць жыццё тысячам украінцаў", — сказаў украінскі міністр.
Да ініцыятывы Wargaming падключыліся людзі са 115 краін свету. Актыўней за ўсё дабрачынныя наборы куплялі гульцы з Германіі, ЗША, Польшчы, Чэхіі і Вялікабрытаніі.
Wargaming пакінуў Беларусь і Расію ў сакавіку 2022 года. Бізнес у гэтых краінах быў перададзены мясцоваму ўпраўленню Lesta Studio, якая больш не звязаная з Wargaming. Кампанія заявіла, што не атрымлівае прыбытку ў Беларусі і Расіі.
