Андрэй Дынько: Цяпер мы маем статус закладнікаў
Шэф-рэдактар газеты "Наша ніва" пракаментаваў у эфіры Еўрарадыё сваё патрапленне ў спіс невыязных з Беларусі.
Нагадаем, сёння Андрэй Дынько не змог выехаць у Вільню. Памежнікі параілі яму звяртацца па тлумачэнні ў Аддзел міграцыі і грамадзянства МУС на месцы жыхарства.
Дынько: "Мы цяпер маем статус закладнікаў. Незвычайна. Ніколі раней не быў...".
Паводле яго словаў, ён будзе высвятляць, чаму ён туды патрапіў, бо "ніколі не выказваўся наконт санкцый".
Раней у Літву беларускія памежнікі не прапусцілі палітыкаў Анатоля Лябедзьку, Сяргея Калякіна, Віктара Карняенку, а таксама праваабаронцу Валянціна Стэфановіча.
Яшчэ 29 лютага партал TUT.BY са спасылкай на крыніцу, блізкую да кіраўніцтва краіны, паведаміў, што створаны спіс невыязных, у якім значыцца 108 прозвішчаў — людзей, якія заклікалі да ўвядзення санкцый. Ужо праз некалькі дзён Генпракуратура папярэдзіла, што за заклік да санкцый не выпусцяць за мяжу, а могуць і завесці крымінальную справу. Аднак афіцыйна ніхто не пацвердзіў, што адмысловы спіс існуе.
Фота — bymedia.net
