Саступкі Лукашэнку толькі ствараюць для яго пачуццё беспакаранасці — Ціханоўская

Лідарка беларускіх дэмсіл Святлана Ціханоўская пракаментавала інфармацыю пра тое, што Украіна летась магла прасіць ЕС не ўводзіць санкцыі супраць афіцыйнага Мінска. "Мы разумеем, што ўлады Украіны не хочуць правакаваць Лукашэнку, — піша яна. — Але калі з’яўляюцца думкі пра тое, што гэта яго спыніць, — яны памылковыя". Ціханоўская нагадвае, што год таму Аляксандр Лукашэнка абяцаў уладам Украіны, што з беларускай тэрыторыі не будзе нападу, але ён адбыўся.

"Лукашэнка ніколі не трымае слова і будзе рабіць тое, што скажа Расія, — працягвае Святлана Ціханоўская. — Ён не выпадкова апынуўся ў такой сітуацыі. Ён не закладнік і не ахвяра — ён абраў інтэграцыю з Расіяй яшчэ ў 90-х, калі пачаліся падпісанні дакументаў пра саюзную дзяржаву. Ягоная палітыка прывяла да пачатку вайны супраць Украіны, а таксама да пагрозы незалежнасці Беларусі. Яго саўдзел у вайне дазволіў адбыцца генацыду ў Бучы, Ірпені, Чарнігаўскай і Кіеўскай абласцях".

Ціханоўская перакананая, што саступкі Лукашэнку "ў разгар вайны толькі ствараюць для яго пачуццё беспакаранасці", і ён "упэўніваецца, што можа і далей праводзіць рэпрэсіі, забіваць людзей і дазваляць нападаць на Украіну з тэрыторыі Беларусі".

Святлана Ціханоўская нагадвае Кіеву, што "беларусы, пра чые інтарэсы сапраўды трэба думаць — гэта беларускія актывісты, добраахвотнікі і валанцёры, якія дапамагаюць Украіне і змагаюцца супраць Расіі", а таксама палітзняволеныя.