Савет Еўропы заклікаў даць доступ праваабаронцам і СМІ да памежных раёнаў
Дзіця-мігрант падчас раздачы ежы ў лагістычным цэнтры / БЕЛТА
Міжнародныя і нацыянальныя праваабаронцы і журналісты мусяць атрымаць неадкладны доступ да раёнаў на мяжы Польшчы і Беларусі, заявіла камісар Савета Еўропы па правах чалавека Дуня Міятавіч у пятніцу.
Па словах Міятавіч, гэта мусіць быць зроблена, каб "пакласці канец чалавечым пакутам і парушэнням правоў чалавека".
Камісар Савета Еўропы па правах чалавека зрабіла гэтую заяву падчас 4-дзённай паездкі ў Польшчу.
У асобнай заяве на сайце Савеце Еўропы адзначаецца, што памежны крызіс "стаў вынікам дзеянняў з беларускага боку, але гэта не вызваляе Польшчу ад абавязанняў у галіне правоў чалавека". Забарона Варшавы на доступ да памежных раёнаў у рамках рэжыму надзвычайнага становішча прывяла да таго, што міжнародныя арганізацыі не могуць аказваць людзям гуманітарную і юрыдычную дапамогу, адзначае Савет Еўропы. Таксама да мяжы не могуць трапіць журналісты, і гэта падрывае свабоду слова і інфармацыі. "Журналістам мусіць быць дазволена рабіць рэпартажы з усіх раёнаў уздоўж мяжы свабодна і бяспечна", — адзначаецца ў заяве.
