Галоўнага рэжысёра тэатра лялек у Гродне Алега Жугжду судзяць за "экстрэмізм"
Алег Жугжда / realnoevremya.ru
Разгром тэатральнай сферы ў Беларусі працягваецца.
26 лістапада ў судзе Ленінскага раёна Гродна судзяць Алега Жугжду. Як піша Hrodna.life, хутчэй за ўсё гаворка ідзе пра галоўнага рэжысёра Гродзенскага абласнога тэатра лялек — яго прозвішча даволі рэдкае.
Жугжду вінавацяць у "распаўсюдзе экстрэмісцкіх матэрыялаў" (арт 19.11 ч. 2 КаАП). Як правіла, вынікам такіх судоў становяцца не толькі "суткі" ці штрафы, але і звальненне з тэатра.
Жугжда — ураджэнец Вільні. У Гродзенскім абласным тэатры лялек ён працуе з 2000 года.
Рэжысёр з'яўляецца лаўрэатам і дыпламантам міжнародных фестываляў. Ён мае званне заслужанага дзеяча мастацтваў Беларусі і мноства ўзнагарод (медаль Скарыны, нагрудны знак "За ўнёсак у развіццё культуры Беларусі", прыз Беларускага саюза тэатральных дзеячаў "Крыштальны анёлак" — "За ўнёсак у развіццё беларускага тэатра лялек", прэмія імя Дубко як "Рэжысёр года", "Чалавек года Гродзеншчыны 2014").
