Дэпутатка патлумачыла жыхарам Лельчыцаў, чаму выбары прызначылі на студзень

Дэпутатка Палаты прадстаўнікоў Святлана Сянько патлумачыла жыхарам Лельчыцаў, чаму прэзідэнцкія выбары прызначылі на студзень. Паводле яе слоў, найперш была ўлічана "станоўчая практыка арганізацыі рэферэндуму 2022 года і адзінага дня галасавання 2024 года". Як вядома, гэтыя мерапрыемствы праходзілі ва ўмовах рэпрэсій у Беларусі.

"Зімовы месяц — гэта самы аптымальны перыяд, калі людзі вольныя, не занятыя ва ўборачнай кампаніі, адукацыйныя ўстановы, дзе будуць размешчаны ўчасткі для галасавання, не задзейнічаны ва ўступных выпрабаваннях, людзі знаходзяцца на работах, а не ў адпачынках", — працягнула тлумачэнне дэпутатка. І дадала, што "прэзідэнцкія выбары папярэднічаюць заканчэнню папярэдняй і пачатку наступнай пяцігодкі".

"Падводзіць вынікі і вызначаць далейшы стратэгічны курс развіцця краіны, асноўныя напрамкі ўнутранай і знешняй палітыкі павінен зноў абраны кіраўнік дзяржавы", — так скончыла сваю аргументацыю Сянько. Яна заклікала прысутных на сходзе працаўнікоў адной з мясцовых арганізацый "зрабіць правільны выбар". Дэпутатка ўпэўненая, што першага тура будзе дастаткова.

Яшчэ ў кастрычніку дэмакратычныя сілы прынялі заяву пра "бязвыбары" прэзідэнта 2025 года ў Беларусі. Выбары ў атмасферы страху, рэпрэсій не могуць быць справядлівымі, заявіў Еўрапарламент.