Сенат ЗША асудзіў Уладзіміра Пуціна як "ваеннага злачынцу"
Уладзімір Пуцін / ТАСС
Сенат ЗША ў аўторак прагаласаваў за рэзалюцыю, у якой назваў прэзідэнта Расіі Уладзіміра Пуціна "ваенным злачынцам" і асудзіў яго дзеянні. Аб гэтым паведамляе Reuters.
На галасаванне рэзалюцыю вынес сенатар-рэспубліканец Ліндсі Грэм. Але падтрымалі яе і дэмакраты. Дакумент быў прыняты аднагалосна. Такое адзінства з'яўляецца рэдкай з'явай "у глыбока падзеленым Кангрэсе", адзначае агенцтва.
"Усе мы ў гэтай зале аб'ядналіся разам з дэмакратамі і рэспубліканцамі, каб сказаць, што Уладзімір Пуцін не можа пазбегнуць адказнасці за зверствы, учыненыя супраць украінскага народа", — заявіў перад галасаваннем лідар дэмакратычнай большасці ў Сенаце Чак Шумер.
Сенатары заклікалі Міжнародны крымінальны суд у Гаазе і іншыя краіны расследаваць злачынствы расійскіх вайскоўцаў, якія яны здзейснілі і здзяйсняюць падчас ўварвання Расіі ў Украіну.
Reuters таксама адзначае, што з пачатку вайны, якую Расія вядзе супраць Украіны з 24 лютага, Масква не захапіла ніводнага з 10 найбуйнейшых украінскіх гарадоў.
