"Асобныя паказанні навязваліся". Суд над галоўным рэдактарам TUT.by. Онлайн
У першы дзень суда слухачы сустракалі Марыну Золатава апладысментамі.
У будынку суда Маскоўскага раёна Мінска суд Заводскага раёна працягвае разгляд па справе ў дачыненні да галоўнага рэдактара TUT.by Марыны Золатавай. Гэта справа больш вядомая як "справа БЕЛТА", Золатаву абвінавачваюць у бяздзейнасці службовай асобы — ч.2 арт. 425 КК.
На папярэдніх пасяджэннях было агучанае абвінавачванне, а таксама дапытаныя некаторыя сведкі. Сярод іх супрацоўнікі БЕЛТА, у тым ліку гендырэктар агенцтва Ірына Акуловіч, кіраўнік Белтэлерадыёкампаніі Іван Эйсмант, галоўны рэдактар "СБ. Беларусь Сегодня" Дзмітрый Жук, гендырэктар ЗАТ "БелКП-Прэс" — выдавец беларускай "Камсамолкі" — Наталля Галезнік і іншыя.
На пасяджэнні 14 лютага чакаюцца выклікі ў якасці сведак супрацоўнікаў TUT.BY.
У гісторыі сучаснай Беларусі "справа БЕЛТА" — гэта не першы выпадак, калі галоўнага рэдактара СМІ судзяць за прафесійную дзейнасць. Крымінальны пераслед у дачыненні да 14 іншых фігурантаў быў спынены.
"Справа БЕЛТА" распачалася 7 жніўня 2018 года каля 09:20 раніцы з затрыманняў журналістаў і рэдактараў некалькіх СМІ, а таксама вобшукаў у іх кватэрах. Следчы камітэт паведаміў, што распачаў крымінальную справу па ч.2 ст.349 (Несанкцыянаваны доступ да камп’ютарнай інфармацыі, учынены з іншай асабістай зацікаўленасці, што пацягнула прычыненне істотнай шкоды). Як стала вядома пазней, пад "несанкцыянаваным доступам" следчыя мелі на ўвазе той факт, што рэдактары і журналісты чыталі платныя навіны дзяржаўнага інфармагенцтва па закрытай падпісцы БЕЛТА пад чужым паролем.
"Да дадзенай супрацьпраўнай дзейнасці датычныя службовыя асобы выдавецкага дома "Беларуская навука", ЗАТ "БелаПАН", ТАА "Тутбай Медыя". Сёння па падазрэнні ў здзяйсненні злачынства затрыманыя галоўны рэдактар TUT.BY Марына Золатава, рэдактар TUT.BY Ганна Калтыгіна, журналіст БелаПАН Таццяна Каравянкова", — пісаў Следчы камітэт.
У лістападзе журналістам ды рэдактарам былі прад'яўленыя абвінавачванні па ч.2 ст.349, а галоўнаму рэдактару TUT.BY Марыне Золатавай — па ч.2 арт.425 КК (Бяздзейнасць службовай асобы).
Пасля крымінальны пераслед у дачыненні да 14 фігурантаў быў спынены — яны заплацілі шкоду дзяржаве ў памеры ад 3000 да 17 000, а таксама штрафы. Так адзінай фігуранткай "справы БЕЛТА" засталася толькі Марына Золатава. Следчы камітэт двойчы адмовіў ёй у хадайніцтве аб спыненні крымінальнага пераследу.
