Суд у Польшчы разгледзіць справу аб катаваннях трох беларусаў у РБ

Суд у Польшчы разгледзіць справу аб катаваннях трох беларусаў у Беларусі. Пра гэта паведаміў кіраўнік Народнага антыкрызіснага ўпраўлення, намеснік кіраўніцы Аб’яднанага пераходнага кабінета Павел Латушка. Паводле яго слоў, разгляд крымінальнай справы адбудзецца у Акруговым судзе Варшавы 6 чэрвеня. Латушка выказаў спадзяванне, што ў дачыненні асоб, якія здзяйснялі гвалт, распачнуць крымінальную справу.

"Мы ўжо дамагліся выдачы шасці ордэраў на арышт, у тым ліку катам з Акрэсціна і Жодзіна, — цытуе словы Паўла Латушкі "Позірк". — Мы павінны паказаць усім тым, хто з'яўляецца сёння гестапаўцамі ў Беларусі, што яны будуць за гэта адказваць".

Польскі ўрад плануе ўнесці змены ў заканадаўства, якія "дазволяць адкрыць дарогу для ўніверсальнай юрысдыкцыі і выдаваць у міжнародны вышук ордэры на тых, хто здзекуецца з беларусаў", кажа Латушка.

Як вядома, у Беларусі пад рэпрэсіі трапілі дзясяткі тысяч чалавек. Ніхто з катаў не быў пакараны.