Сын "кашалька" Лукашэнкі Аляксандра Зайцава заняўся ў Беларусі аўтабізнесам
Сын бізнесмена Зайцава пачаў з аўтамабіляў (ілюстрацыйнае фота) / sb.by
20-гадовы Раман Зайцаў, сын "кашалька" Лукашэнкі Аляксандра Зайцава, заняўся ў Беларусі аўтабізнесам. У яго ўласнасці 50% кампаніі "Лакшэры Мотарс груп", якая з’явілася ў чэрвені 2023 года. Гэта афіцыйны прадстаўнік і эксклюзіўны дыстрыб’ютар кітайскага брэнда Shineray у Беларусі, піша "Бюро".
Арганізацыя зарэгістраваная ў мінскім бізнэс-цэнтры "Няміга-сіці". Менавіта там размяшчаюцца офісы кампаній, звязаных з прарэжымнымі бізнесменамі Аляксандрам Зайцавым, Аляксеем Алексіным і Мікалаем Вараб’ём. "Лакшэры Мотарс груп" таксама валодаюць Павел Садоўнікаў (40%) і Аляксандр Гурскі (10%). Садоўнікаў валодае кампаніяй "Лакшэры Мотарс плюс". Гэта афіцыйны дылер GEELY ў Беларусі з двума аўтасалонамі ў сталіцы.
Мінулай восенню cаўладальнік і па сумяшчальніцтве дырэктар "Лакшэры Мотарс груп" Павел Садоўнікаў расказаў, што кампанія запускае на заводзе "Юнісон" серыйную зборку аўтамабіляў Shineray у Беларусі (завод пачаў збіраць і аўтамабілі Sinotruk). Такое рашэнне звязанае з прэферэнцыямі, якія дае дзяржава для беларускай зборкі і якія адаб’юцца на канечным кошце аўтамабіля.
