У баскетбалісткі Алены Леўчанка выявілі COVID-19
Баскетбалістка Алена Леўчанка захварэла на COVID-19, пра гэта яна сама паведаміла ў сацсетках.
"У мяне пацвердзіўся COVID. Напэўна, паўгода таму гэта гучала б так, быццам самая страшная хвароба прыйшла па цябе. Але цяпер — пасля ўсіх падзей лета і восені — каранавірус успрымаецца лягчэй", — напісала спартоўка.
Цяпер Леўчанка знаходзіцца ў Афінах. Яна кажа, што здавала тэст на каранавірус перад адлётам з Беларусі і адразу па прылёце ў Грэцыю. Вынік быў адмоўным. А потым неяк увечары яна выявіла, што страціла нюх. Пасля гэтага тэст на COVID-19 даў станоўчы вынік.
"Цяпер тэмпературы няма, смак у ежы слаба выяўлены, і ёсць пачуццё закладзенасці носа, хоць дыхаецца добра", — адзначае баскетбалістка.
Леўчанка не выключае, што захворванню паспрыяў яе арышт : "Я ведаю, што ад COVIDа ніхто не застрахаваны, але, калі імунітэт аслаблены, арганізм менш супраціўляем вірусам. Думаю, Акрэсціна зрабіла тут сваю справу".
Алена Леўчанка — падпісантка ліста спартоўцаў за новыя сумленныя і адкрытыя прэзідэнцкія выбары і спыненне гвалту на вуліцах. Яна прымала актыўны ўдзел у мірных вулічных шэсцях. За гэта ў кастрычніку яна была асуджаная і правяла 15 сутак на Акрэсціна.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
