У Італіі былы муж забіў беларуску і прывёз яе цела ў паліцыю ў багажніку
Ганна Свірыдзенка / t.me/belarusinitalia/
У Італіі ў горадзе Модэна былы муж забіў беларуску. Як паведамляе Народная амбасада Беларусі ў Італіі, ахвярай стала 40-гадовая Ганна Свірыдзенка, маці дваіх дзяцей, беларуска па паходжанні і грамадзянка Італіі. Былы муж сам здаўся паліцыі і прывёз цела забітай ва ўчастак у багажніку аўтамабіля. Паводле даных следства, прычынай злачынства стала спрэчка за дзяцей.
Жанчына працавала доктаркай у клініцы ў аўстрыйскім Інсбруку, вучылася на спецыяліста па радыялогіі ў Модэне. Яна "рабіла ўсё магчымае, каб сумяшчаць працу і выхаванне дзяцей, якія былі з ёй тры тыдні ў месяц".
Былы муж — 48-гадовы Андрэа Палтрыньеры з Модэны. Ганна Свірыдзенка якраз вярнулася з Аўстрыі за дзецьмі, каб разам з імі паехаць у адпачынак. Матывам забойства стала жаданне маці аформіць поўную апеку.
