У Нідэрландах забілі дальнабойшчыка з Беларусі
![Месца забойства дальнабойшчыка з Беларусі](/sites/default/files/styles/gallery_main/public/2023-11/screenshot_2023-11-10_182958.png.webp?itok=RCPUsZxg)
Месца забойства дальнабойшчыка з Беларусі / Скрыншот
У Нідэрландах забілі дальнабойшчыка з Беларусі. Пра гэта асцярожна пісалі мясцовыя і беларускія СМІ, а сёння факт афіцыйна пацвердзіла Міністэрства замежных спраў.
"Пасольства Беларусі ўжо больш за два тыдні знаходзіцца ў пастаянным кантакце па гэтай тэме з праваахоўнымі органамі краіны знаходжання, сям'ёй загінулага, аказваецца ўся неабходная консульска-прававая дапамога", — паведамілі там. Дыпламаты таксама выказалі спачуванні родным і блізкім загінулага беларуса.
Кіроўца, які працаваў у літоўскай транспартнай кампаніі Finėjas, ехаў маршрутам з Паўднёвай Еўропы ў Нідэрланды. Але ўвечары 21 кастрычніка цела маладога чалавека знайшлі на стаянцы каля мяжы з Бельгіяй, дзе ён спыніўся на адпачынак.
Як пісала нідэрландскае выданне Omroep Brabant, цела 25-гадовага беларуса Максіма Грыня знайшлі пасярод паркоўкі недалёка ад горада Брэда. Іншы кіроўца грузавіка бачыў, як чалавек захістаўся і паваліўся на зямлю — гэта і быў Грынь.
Паліцыя высветліла, што беларус пад'ехаў да паркоўкі пасля 6:30 раніцы. Нажавое раненне ён атрымаў амаль праз 12 гадзін. Іншыя дальнабойшчыкі выклікалі надзвычайныя службы, але дапамога прыйшла запозна.
Што адбылося ў той дзень, дагэтуль незразумела. У паліцыі дзве асноўныя версіі: бандыцкі напад і бытавая сварка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.