Беларусы не змогуць выйсці з транзітнага Калінінградскага цягніка ў Вільні

Грамадзяне Беларусі, якія едуць на транзітным цягніку праз тэрыторыю Літвы ў Калінінград, не змогуць выйсці ў Вільні, піша выданне Delfi са спасылкай на пастанову ўрада.

Цягнікі не ездзяць з Беларусі ў Літву ўжо каля 3,5 гадоў. Але па літоўскай тэрыторыі па-ранейшаму ходзяць цягнікі да Калінінграда.

Раней такія меры дзейнічалі для станцый Кяна (каля 20 кіламетраў ад мяжы з Беларуссю) і Кібартай (чыгуначная станцыя на мяжы з Калінінградскай вобласцю). Цяпер высадку і пасадку на транзітны цягнік забаранілі і ў Вільні. Забарона дзейнічае для грамадзян Беларусі і Расіі. Наяўнасць шэнгенскай візы значэння не мае.

Таксама Літва ўвяла абмежаванні на пасажырскія перавозкі нерэгулярнымі міжнароднымі маршрутамі з Беларусі. Цяпер бусы, што маюць больш за 9 месцаў для сядзення, не змогуць вазіць пасажыраў з Беларусі ў Літву.