У новы пакет санкцый ЕС трапілі два беларускія чыноўнікі

У 11-м пакеце санкцый супраць Расіі ЕС увёў персанальныя абмежаванні супраць 87 чалавек. Сярод іх выявіліся і беларусы. Рашэнні Еўрасавета апублікаваныя ў Афіцыйным часопісе ЕС.

У санкцыйны спіс уключаны старшыня Дзяржкамваенпрама Беларусі Дзмітрый Пантус. У рашэнні ЕС тлумачыцца, што гэтае ведамства забяспечвае вытворчасць зброі для расійскіх Узброеных сіл на падпарадкаваных яму прадпрыемствах. На сваёй пасадзе Пантус аказвае ваенную падтрымку Расіі ў ваеннай агрэсіі супраць Украіны.

Таксама ў "чорны спіс" трапіў і начальнік Беларускай чыгункі Уладзімір Марозаў. У ЕС падкрэсліваюць, што ён падтрымлівае транспартаванне расійскага ваеннага персаналу і грузаў.

Пераважна ж у спіс увайшлі грамадзяне Расіі, у тым ліку чыноўнікі, датычныя да дэпартацыі ўкраінскіх дзяцей.