Беларусам прапануюць кубінскую вакцыну ад каранавіруса. А яна наогул працуе?

09/11/2022 - 15:13

Што вядома пра кубінскую вакцыну ад каранавіруса? / калаж Улада Рубанава, Еўрарадыё

Што вядома пра кубінскую вакцыну ад каранавіруса? / калаж Улада Рубанава, Еўрарадыё

Мінская паліклініка №19 пачала прышчапляць ад каранавіруса вакцынай "Саберана Плюс", якую вырабляюць... на Кубе. Цяпер прэпарат прапануюць як бустар для тых, хто раней вакцынаваўся "Спутником" або кітайскім "Сінафармам".

Рабіць бустарную прышчэпку ад COVID-19 трэба, але ці варта рызыкаваць і рабіць укол кубінскай вакцынай? Ды і ці працуе яна наогул?

Пакуль без прызнання СААЗ

Паводле дадзеных на пачатак лістапада, вытворца вакцыны "Саберана Плюс" не падаў ніякіх дакументаў у Сусветную арганізацыю аховы здароўя для атрымання ўхвалення ў выкарыстанні.

Пералік краін, дзе выкарыстоўваюць "Саберану Плюс", абмежаваны: гэта сама Куба, а таксама Іран, Нікарагуа, Венесуэла і Беларусь. Там жа выкарыстоўваюць і вакцыну "Саберана 2" — практычна той самы прэпарат, але створаны для першаснай, а не бустарнай вакцынацыі.

Вакцына бяспечная?

Сур'ёзных даследаванняў "Сабераны" пакуль няшмат, аднак пра вакцыну ёсць некалькі публікацый, у тым ліку ў паважаных The Lancet і Nature.

"Былі выяўленыя нязначныя непажаданыя з'явы, найбольш частай з якіх быў боль у месцы ін'екцыі (105 [29%] з 364 у групе ўмяшання; 13 [15%] з 86 у групе плацэба). Паспяховы імунны адказ быў знойдзены ў 289 (81%) з 358 удзельнікаў праз 28 дзён пасля вакцынацыі", — гаворыцца ў адной з навуковых прац на The Lancet.

У каментары для Nature кіраўнік аддзела распрацоўкі вакцын у Novateur Ventures (Канада) Крэйг Лафер'ер адзначыў, што вакцыны на аснове бялку (гэта значыць і "Саберана") могуць мець перавагі перад іншымі тыпамі вакцын: напрыклад, іх не трэба захоўваць пры вельмі нізкіх тэмпературах, а таксама ў іх можа быць менш пабочных эфектаў. Але гэта ў цэлым пра такія вакцыны.

Аднак бяспеку гэтай вакцыны пацвярджае не толькі вопыт масавага прымянення без негатыўных наступстваў, але і іншыя навуковыя працы — у тым ліку ў прэстыжным Public Health. Таму тут, здаецца, пытанняў да "Сабераны" няма.

А наколькі яна эфектыўная?

Тое, што "Саберана" бяспечная, яшчэ не значыць, што яна эфектыўная: укалоць бяспечна можна і ваду. А што наконт эфектыўнасці новай вакцыны, якую прапануюць мінчанам?

Публікацыі ў тых жа Nature і Lancet у гэтым пытанні таксама кампліментарныя. Хоць можа з'явіцца перадузятасць, "як на Кубе могуць зрабіць эфектыўную вакцыну", на самай справе фармацэўты і біятэхнолагі там працуюць добра — ва ўмовах ізаляцыі ЗША краіна была вымушаная развіваць сферу самастойна.

Яшчэ ў канцы 2021-га, калі вынікі даследаванняў і выкарыстання "Сабераны" выйшлі за межы адной толькі Кубы, эфектыўнасць трох яе дозаў ацэньвалася ў 92,4%. Праўда, даследаванні праводзіліся ў разгар дэльта-штаму: з "амікронам" і больш новымі падвідамі каранавіруса эфектыўнасць падае ва ўсіх вакцын.

Эфектыўнасць вакцыны паказалі і іншыя навуковыя працы: напрыклад, раз, два і тры.

Выснова? Хоць адсутнасць ацэнкі з боку СААЗ або Еўрапейскага медыцынскага агенцтва і выклікае насцярожанасць (што цалкам апраўдана), мяркуючы па ўсім, кубінская вакцына можа быць бяспечнай і эфектыўнай. Ці вакцынавацца ёю — вырашаць вам і вашаму доктару, аднак памятайце, што бустар (рэвакцынацыю) рабіць трэба ў любым выпадку, каб пазбегнуць цяжкіх наступстваў каранавіруса.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.