Віктар Ганчарэнка стаў галоўным трэнерам "Уфы"
Віктар Ганчарэнка стаў галоўным трэнерам расійскага футбольнага клуба "Уфа". Беларускі спецыяліст падпісаў працоўнае пагадненне, разлічанае на два гады (з магчымасцю працягнення кантракту на яшчэ адзін сезон). Пра гэта паведамляе прэс-служба ФК "Уфа". Адзначаецца, што афіцыйнае прадстаўленне Ганчарэнкі камандзе адбудзецца 18 чэрвеня, калі футбалісты збяруцца пасля заканчэння адпачынку.
Ганчарэнку 38 гадоў. Ён — былы галоўны трэнер БАТЭ (2008-2013, упершыню вывеў беларускі клуб у групавы раўнд Лігі чэмпіёнаў), "Кубані" (2013-2014) і "Урала" (2015). З мінулага года Віктар Ганчарэнка працаваў у трэнерскім штабе маскоўскага ЦСКА.
У мінулым сезоне "Уфа" заняла ў расійскай прэм'ер-лізе 12-е месца сярод 16-ці каманд. Кіраўніцтва клуба спадзяецца, што з дапамогай беларускага спецыяліста будзе зроблены "якасны скачок наперад".
