Паўднёвая Карэя пашырыць спіс экспартнага кантролю ў дачыненні да Беларусі
![У "чорным спісе" будзе 1402 наймення тавараў](/sites/default/files/styles/gallery_main/public/2024-05/stop-3661623_1280.jpg.webp?itok=6AhrOHSY)
У "чорным спісе" будзе 1402 наймення тавараў / pixabay.com
Паўднёвая Карэя пашырыць спіс экспартнага кантролю ў дачыненні да Беларусі і Расіі. Чакаецца, што змены пачнуць дзейнічаць да канца жніўня, паведамляе en.yna.co.kr.
Па звестках выдання, Міністэрства прамысловасці Паўднёвай Карэі збіраецца дадаць яшчэ 243 найменні ў спіс тавараў, экспарт якіх у РБ і РФ рэгулюецца. У новы пералік прадукцыі ўваходзяць металарэзнае абсталяванне, дэталі аптычных прыбораў і датчыкі. Мяркуецца, што яны патэнцыйна могуць быць выкарыстаныя ў вайсковых мэтах.
Такім чынам, колькасць згаданых тавараў павялічваецца да 1402. Паўднёвая Карэя зрабіла больш жорсткім кантроль за пастаўкамі такіх тавараў пасля ўварвання Расіі ва Украіну ў 2022 годзе (летась санкцыі пашыраліся). Цяпер жа на пашырэнне экспартнага кантролю Сеул падштурхнула нядаўняе падпісанне Масквой і Пхеньянам "усёабдымнай стратэгічнай дамовы".
Адзначаецца, што ўрад можа разгледзіць кожны канкрэтны выпадак і даць дазвол на пастаўку, асабліва ў дачыненні да камерцыйных здзелак, заключаных да аб'яўлення новых санкцый.
![Паўднёвая Карэя пашырыць спіс экспартнага кантролю ў дачыненні да Беларусі](/sites/default/files/styles/default_image_paragraph/public/paragraphs/image/AEN20240628005300320_01_i_P4.jpg.webp?itok=j1wkJ2Dg)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.