Вільня — адзін з цэнтраў супраціву рэжыму Лукашэнкі, заявілі ў Сейме Літвы

Старшыня Сейма Літвы Вікторыя Чміліце-Нільсэн у інтэрв'ю тэлеканалу "Настоящее время" заявіла, што аднаўленне дачыненняў з Беларуссю і Расіяй немагчымае, пакуль працягваецца расійская агрэсія супраць Украіны. "Варта разумець, што мы не можам вярнуцца да развіцця дачыненняў з Расіяй і беларускім рэжымам у фармаце business as usual, — кажа яна. — Прынамсі, да таго часу, пакуль супраць украінцаў працягваецца агрэсія, і да таго часу, пакуль Украіна не пераможа ў вайне і не заключыць мір на сваіх умовах".

Чміліце-Нільсэн падкрэслівае, што варта падзяляць грамадзян Беларусі і рэжым Лукашэнкі, які "трымае ў зняволенні, катуе, пераследуе і жорстка душыць любыя зародкі дэмакратыі".

"Вільня з'яўляецца адным з цэнтраў супраціву рэжыму Лукашэнкі, —  працягвае старшыня Сейма Літвы. — І, як мне здаецца, цяпер будучыня дэмакратыі ў Беларусі, так ці інакш, таксама вырашаецца на палях бітваў ва Украіне. Пра гэта, дарэчы, гаворыць і Святлана Ціханоўская, якая з'яўляецца афіцыйнай госцяй Літоўскай Рэспублікі. У выпадку поспеху Украіны вельмі імаверна, што і ў Беларусі дэмакратычныя змены будуць праходзіць лягчэй, чым у іншых умовах".

Вікторыя Чміліце-Нільсэн кажа, што Літва хоча, каб яе ўсе суседзі былі дэмакратычнымі краінамі.