Водазабеспячэнне ў Мінску аднавілі, але людзі скардзяцца на якасць вады
Якасць вады пакідае жадаць лепшага (ілюстрацыйнае фота) / pixabay.com
Водазабеспячэнне раёнаў Мінска, якія ўчора ўвечары засталіся без вады, поўнасцю адноўлена, піша БЕЛТА са спасылкай на Міністэрства жыллёва-камунальнай гаспадаркі.
Вада знікла напярэдадні ў 20.30 у Кастрычніцкім, Заводскім і Ленінскім раёнах Мінска, а таксама ў аграгарадку Гатава, вёсках Каралішчавічы і Новы Двор Мінскага раёна. Работнікі ЖКГ гаварылі аб тым, што "у сістэме водазабеспячэння назіраецца зніжэнне ціску, адсутнасць і пагаршэнне якасці вады". Да бальніц, размешчаных у гэтых раёнах, быў арганізаваны падвоз вады. Пазней стала вядома, што праблемы ўзніклі з-за аварыі на вадаводзе, была пашкоджана труба ў вёсцы Клімавічы Мінскага раёна. Прычына парыву высвятляецца.
Яшчэ ўчора ўвечары — у раёне 23.30 — пашкоджанне было лакалізавана, заявілі камунальнікі. А ў 00.15 пятніцы вада пачала паступаць у кватэры. Аднак, паводле звестак Мінгарвыканкама, людзі скардзяцца на дрэнную якасць вады.
"Паводле інфармацыі Мінскводаканала, пасля аднаўлення водазабеспячэння аварыйнымі брыгадамі прадпрыемства неадкладна арганізавана прамыванне асобных участкаў сетак водазабеспячэння", — заявілі чыноўнікі. Яны запэўніваюць, што ідзе пастаянны маніторынг "якасці з правядзеннем рэгламентальных работ", і што "праблема будзе вырашана".
