Закрыты суд па "справе БелаПАН" прыпынілі

Закрыты судовы працэс "справе БелаПАН" прыпынены мінімум на два месяцы, паведамляе BPN.

Прычынай называецца аднаўленне "працэсуальных дзеянняў" — гэта значыць, аднавілі расследаванне. У дачыненні да каго з падсудных яно адноўленае, невядома.

Па "справе БелаПАН" пад суд трапілі Андрэй Аляксандраў, Дзмітрый Наважылаў, Ірына Леўшына, Ірына Злобіна. Суд над імі пачаўся 6 чэрвеня. Справу разглядае Мінскі абласны суд. 

У абвінавачанні фігуруюць чатыры артыкулы Крымінальнага кодэкса: "ухіленне ад выплаты падаткаў, збораў", "іншая падрыхтоўка асоб для ўдзелу ў групавых дзеяннях, якія груба парушаюць грамадскі парадак", "здрада дзяржаве", "стварэнне і кіраўніцтва экстрэмісцкім фармаваннем".

БелаПАН — найстарэйшае ў Беларусі незалежнае інфармацыйнае агенцтва, якое існавала з 1991 года. 1 лістапада 2021-га КДБ прызнаў яго "экстрэмісцкім фармаваннем". Абвінавачанні ў стварэнні такога "фармавання" выставілі Леўшынай (яна была дырэктаркай інфармагенцтва), экс-кіраўніку кампаніі Наважылаву і былому намесніку дырэктара Аляксандраву.