Жлобінскі камбінат прымусілі падарыць Курску 350 кг кансерваў
![Кансервы, ілюстрацыйнае фота](/sites/default/files/styles/gallery_main/public/2024-08/kanserva-1608.jpg.webp?itok=93dZz2sg)
Кансервы, ілюстрацыйнае фота / pixabay.com
У Гомелі збіраюць гуманітарную дапамогу для жыхароў Курска, паведамляюць праваабаронцы.
Кіраўніца "Рускага дома ў Гомелі" Вольга Бараненка кажа, што гуманітарная дапамога паедзе ў 143 пункты часовага размяшчэння, у якіх знаходзяцца восем тысяч жыхароў Курскай вобласці.
Праўда, адзначаюць праваабаронцы, акрамя саміх актывістаў "Рускага дома" на заклік сабраць гуманітарку пакуль ніхто не адгукнуўся. Актывісты гатовыя прыняць усё — ад падушак і коўдраў да пральных машын, халадзільнікаў і абагравальнікаў. У спісе неабходных тавараў пазначана больш за 60 пазіцый. Пры гэтым лекі прымаюцца толькі разам з чэкам, а прамтавары павінны быць у заводскай ўпакоўцы і з дзейнымі тэрмінамі прыдатнасці.
Акрамя "Рассупрацоўніцтва" (да якога належыць "Рускі дом") у зборы гуманітаркі паўдзельнічаў Жлобінскі мясакамбінат — ахвяраваў 350 кг кансерваў. На сёння ўдалося сабраць каля дзвюх тон грузу.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.