Жоўтыя вазы ў Мінску не перафарбуюць — у бліжэйшы год

Жоўтыя вазы на праспекце Незалежнасці ў Мінску пакуль што не будуць перафарбоўваць, а белы колер ім вернуць толькі да травеньскіх святаў 2019 года, паведамляе TUT.by са спасылкай на “Горрэмаўтадар”.

Сёлета ўвесну гэтыя архітэтурныя элементы пафарбавалі ў нетыповы для іх жоўты колер, што выклікала неадназначную рэакцыю ў жыхароў і гасцей сталіцы. Праціўнікі гэтай ідэі настойвалі на тым, што жоўты колер парушыў існуючую кампазіцыю праспекта і першапачатковую ідэю.

Яшчэ ў траўні камітэт архітэктуры Мінгарвыканкама даслаў у “Горрэмаўтадар” прадпісанне вярнуць белую фарбу, а той звярнуўся ў Мінкульт. Аднак міністэрства прапанавала занадта дарогое рашэнне па аднаўленні слою фарбы, на які ўжо выдаткавалі бюджэтныя сродкі сёлета. Таму вырашылі перафарбаваць на наступны год, калі грошы на гэта з’явяцца.