70-гадовага пенсіянера асудзілі на 6 гадоў у калоніі за паведамленні ў сеціве
Справу пенсіянера разглядаў суд Ленінскага раёна Гродна / TUT.BY
70-гадовага пенсіянера з Нясвіжа Васіля Дземідовіча асудзілі на 6 гадоў калоніі ўзмоцненага рэжыму і штрафу ў 1600 рублёў. Акрамя таго, ён павінен выплаціць маральную кампенсацыю пацярпелым у памеры 32 000 беларускіх рублёў. Такое рашэнне прыняў суд Ленінскага раёна Гродна, паведамляюць праваабаронцы.
Пажылога мужчыну абвінавацілі паводле чатырох артыкулаў КК: у "арганізацыі масавых беспарадкаў" і "абразах" — Аляксандра Лукашэнкі, суддзі і прадстаўніка ўлады. Паводле версіі абвінавачвання, Дземідовіч "у перыяд з верасня 2021 года да студзеня 2022 года размяшчаў у інтэрнэт-месенджары Telegram паведамленні, якія ўтрымліваюць падбухторванні, жаданне, зацікаўленасць і гатоўнасць да стварэння узброеных аб'яднанняў, накіраваных на нанясенне шкоды".
Акрамя таго, ён публікаваў у сеціве абразлівыя, на думку следства, каментары ў адрас чыноўнікаў і прадстаўнікоў улады. Праваабаронцы падаюць некалькі такіх каментароў з матэрыялаў справы: "пакуль рабочага руху няма", "патрэбная ўсеагульная стачка па ўсёй краіне", "чакаю ў Беларусі ўзброеныя сілы НАТА", "зноў чарговы калхазан і ябацька".
Раней Дземідовіча ўжо прыцягвалі да адміністрацыйнай адказнасці за ўдзел у акцыях пратэсту.
