ААН ладзіць у Мінску міжнародную канферэнцыю па смяротным пакаранні

10 сакавіка ў Мінску адкрыецца міжнародная канферэнцыя па праблеме смяротнага пакарання. Яе ладзіць прадстаўніцтва ААН у Беларусі і Міністэрства замежных спраў пры фінансавай падтрымцы брытанскай амбасады.

У канферэнцыі прымуць удзе эксперты з шэрагу краін. Сярод іншых — спецыяльны прадстаўнік Еўрасаюза па правах чалавека Стаўрас Ламбрынідзіс, які напярэдадні прыехаў зь візытам у Беларусь. Таксама ўдзельнікамі канферэнцыі стануць спецдакладчык Парламенцкай асамблеі Савет Еўропы па сітуацыі ў Беларусі Андрэа Рыгоні, старшыня камітэту па замежных справах Палаты дэпутатаў Чэхіі Карэл Шварцэнбэрг, пасол Вялікабрытаніі ў Беларусі Фіёна Гіб, прадстаўнік ПРААН у Беларусі Санака Самарасінха, прадстаўнікі беларускага ўраду, Беларускага Хельсінкскага камітэту.

За ўсю гісторыю незалежнай Беларусі было вынесена 406 смяротных прысудаў, прычым два апошнія — за пачатак 2016 года, нагадвае Радыё "Свабода". Беларусь — адзіная краіна Еўропы, дзе ўжываюць смяротнае пакаранне.

Дарэчы, супраць смяротнага пакарання некалькі гадоў вядуць кампанію праваабаронцы "Вясны". Але іх на канферэнцыю не запрасілі, бо гэты праваабарончы цэнтр закрыты беларускімі ўладамі.