Прызначаны новы спецдакладчык ААН па правах чалавека ў Беларусі
Нілс Муйжніекс / СоЕ
Новым спецдакладчыкам ААН па правах чалавека ў Беларусі стаў Нілс Мужніекс. Яго прызначылі на пасяджэнні 57-й сесіі Савета ААН па правах чалавека, якое прайшло ў Жэневе 11 кастрычніка.
Муйжніекс — эксперт у сферы абароны правоў чалавека з 25-гадовым досведам. Ён займаў пасаду камісара па правах чалавека ў Савеце Еўропы, узначальваў рэгіянальнае прадстаўніцтва Amnesty International у Еўропе і супрацоўнічаў з беларускімі праваабаронцамі. На пасадзе спецдакладчыка ААН па Беларусі ён замяніў Анаіс Марын.
Спецдакладчык ААН — гэта эксперт, які праводзіць незалежны маніторынг правоў чалавека ў нашай краіне, рэгулярна рыхтуе рэкамендацыі па паляпшэнні сітуацыі. Таксама ён адсочвае, як беларускія ўлады выконваюць міжнародныя абавязанні ў сферы павагі і захавання правоў чалавека.
