Байдэн: Расія бессаромна парушыла асновы cтатута ААН
Джо Байдэн прамаўляе ў ААН / reuters.com
Расія бессаромна парушыла асновы cтатута ААН, заявіў прэзідэнт ЗША Джо Байдэн. У сераду ён выступіў на Генасамблеі Арганізацыі Аб'яднаных Нацый.
"Пастаянны член Савета бяспекі ААН уварваўся ў суседнюю краіну, — гаварыў Байдэн. — ...Пуцін зноў пагражаў Еўропе ядзернай зброяй. І цяпер Расія набірае яшчэ большую колькасць салдат, Расія спрабуе арганізаваць фэйкавы рэферэндум. І гэта з'яўляецца непасрэдным парушэннем статута ААН".
Амерыканскі прэзідэнт падкрэсліў, што Расіі ніхто не пагражаў і "ніхто, акрамя Расіі, не шукаў гэтага канфлікту". Джо Байдэн нагадаў пра наступствы расійскай агрэсіі ва Украіне: пра разбурэнні і вайсковыя злачынствы. "Мэта гэтай вайны — знішчыць украінскую дзяржаву, знішчыць права украінцаў быць асобным народам", — адзначыў ён. Байдэн заявіў, што ЗША і ў далейшым будуць салідарныя з Украінай: "Мы будзем супраць агрэсіі Расіі — кропка!"
