Беларус Ілля Шкурын стаў гульцом месяца ў наймацнейшай футбольнай лізе Польшчы
![Ілля Шкурын](/sites/default/files/styles/gallery_main/public/2023-12/szkuryn-0712.jpg.webp?itok=pBwBiHtZ)
Ілля Шкурын / ekstraklasa.org
Найлепшым гульцом лістапада ў наймацнейшай футбольнай лізе Польшчы — Экстракласе — прызналі беларускага нападніка Іллю Шкурына. У трох матчах ён забіў чатыры галы, адзначае сайт лігі.
Гулец месяца ў Экстракласе вызначаецца ў выніку галасавання капітанаў усіх клубаў лігі. Яшчэ адзін голас маюць заўзятары ў сацсетках.
У гэтым сезоне Шкурын гуляе за футбольны клуб "Сталь" з горада Мелец. Найбольш паспяховым для яго быў матч супраць шчэцінскай "Пагоні" 25 лістапада: у гэтай гульні беларус аформіў хет-трык і прынёс сваёй камандзе валявую перамогу — 3:2.
Яшчэ адзін пераможны гол беларус забіў у матчы супраць "Гурніка" з Забжэ — 2:1.
У 2020-м Ілля Шкурын падтрымаў пратэсты супраць фальсіфікацыі выбараў і выступіў супраць гвалту з боку сілавікоў. Тады ж ён адмовіўся гуляць за беларускую зборную, пакуль ва ўладзе застаецца Лукашэнка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.