Цэнтр персанальных даных пацвердзіў, што на серверы БДУ была атака
"Кіберпартызаны" правялі чарговую атаку / Ілюстрацыйнае фота pixabay.com
Нацыянальны цэнтр абароны персанальных даных пацвердзіў, што на серверы БДУ была атака. Раней Мінадукацыі гэта адмаўляла, сцвярджала, што адбыўся "тэхнічны збой".
"Паводле інфармацыі Беларускага дзяржаўнага ўніверсітэта, накіраванай у Цэнтр, быў ажыццёўлены несанкцыянаваны доступ да інфармацыйнай сістэмы БДУ, пры якім зламыснікамі былі незаконна атрыманыя персанальныя даныя каля 6 тысяч чалавек, — гаворыцца ў паведамленні Нацыянальнага цэнтра абароны персанальных даных. — Па гэтым інцыдэнце цэнтрам будуць прымацца прадугледжаныя заканадаўствам меры".
4 ліпеня "кіберпартызаны" паведамілі, што, у адказ на рэпрэсіўныя меры супраць палітычных іншадумцаў у БДУ, правялі атаку на серверы Белдзяржуніверсітэта. Усе яго сайты недаступныя. Умовай для вяртання базаў даных у БДУ "кіберпартызаны" назвалі вызваленне 50 палітвязняў. Ва ўніверсітэце іх заяву таксама назвалі фэйкам і заявілі пра "тэхнічны збой". Магчыма, спадзяваліся хутка вырашыць праблему. Але не атрымалася.
