"Кіберпартызаны" паведамілі пра атаку на серверы БДУ

"Кіберпартызаны" правялі атаку на серверы Белдзяржуніверсітэта.

Па іх словах, гэта адказ на рэпрэсіўныя меры супраць палітычных іншадумцаў у БДУ. "Спускавым кручком" для дзеянняў "кіберпартызанаў" стала відэа са студэнтам юрфака БДУ, знятае ў стылі ГУБАЗіКа.

"Кіберы" кажуць, што яны паразілі дамен-кантролеры, зашыфравалі рабочыя станцыі, зачысцілі ўсю бухгалтэрыю, воблачныя сэрвісы, пошты файлаабменнікі. Таксама выпампавана больш за 3 тэрабайты даных, выдаленыя базы супрацоўнікаў, студэнтаў, абітурыентаў. Усе сайты bsu.by недаступныя.

"Наша пасланне для ўсіх арганізацый і структур Беларусі: дзейнічаеце як карнікі — значыць, атрымліваеце як карнікі. Тады вы становіцеся для нас цэллю як памагатыя дыктатуры і гвалту", — пішуць "Кіберпартызаны".

Умовай для вяртанне базаў даных у БДУ яны называюць вызваленне 50 палітвязняў.

Аднак вызваленне палітвязняў ад адміністрацыі БДУ аніяк не залежыць.

Ва ўніверсітэце заяву "Кіберпартызанаў" назвалі фэйкам і заявілі пра "тэхнічны збой".