Дамены "экстрэмісцкіх рэсурсаў" у Беларусі будуць анулявацца

Дамены праектаў, прызнаных у Беларусі экстрэмісцкімі матэрыяламі, будуць аўтаматычна анулявацца пасля ўключэння ў "рэспубліканскі спіс экстрэмісцкіх матэрыялаў". Гэта прадугледжана зменамі ў Інструкцыю аб рэгістрацыі даменных імёнаў у нацыянальнай даменнай зоне. Тэкст загаду Аператыўна-аналітычны цэнтр пры прэзідэнце (ААЦ), якім замацоўваюцца гэтыя змены, апублікаваны на Нацыянальным прававым партале.

Большая частка палажэнняў уступае ў сілу пасля афіцыйнага апублікавання. "Даменнае імя, запіс аб рэгістрацыі якога ануляваны < ... > уносіцца ў спецыяльны пералік і становіцца недаступным для рэгістрацыі на працягу перыяду знаходжання адпаведнай інфармацыйнай прадукцыі ў Рэспубліканскім спісе экстрэмісцкіх матэрыялаў", — гаворыцца ў інструкцыі.

Дамены "экстрэмісцкіх рэсурсаў", чый запіс анулюецца, ўносяцца ў "спецыяльны пералік". У дакуменце гаворыцца, што функцыянаванне такіх імёнаў з пераліку "дапускаецца толькі ў інтарэсах нацыянальнай бяспекі".

У інструкцыю ўнесены і іншыя змены.