Еўрасаюз нагадаў Беларусі аб правах чалавека

Пра гэта гаворыцца ў спецыяльнай пастанове Савета міністраў замежных спраў ЕС, прынятай у панядзелак. Пастанова "Аб прыярытэтах ЕС на міжнародных форумах па правах чалавека" прысвячаецца будучай чарговай сесіі Савета ААН па правах чалавека, адзначае interfax.by.

У дакуменце падкрэсліваеццаа асаблівая заклапочанасць у сувязі з неспрыяльным становішчам з правамі чалавека ў шэрагу краін, перш за ўсё ў Сірыі. Там сітуацыя ўяўляе сабой "самы востры гуманітарны крызіс у сучаснай гісторыі".

Акрамя таго, ЕС заклікае міжнародную супольнасць звярнуць увагу на "сур'ёзныя і сістэматычныя парушэнні правоў чалавека" ў Паўночнай Карэі ды таксама расследаваць іх. У дакуменце згадваецца пра трывожнае становішча з правамі чалавека ў Беларусі, Іране, Шры-Ланцы, М'янме, Цэнтральна-Афрыканскай Рэспубліцы, Паўднёвым Судане, Дэмакратычнай Рэспубліцы Конга.

Савет ЕС мае намер запатрабаваць у ААН "хутчэйшага і безумоўнага вызвалення і рэабілітацыі ўсіх палітвязняў у Беларусі".

Фота — manandlaw.info