Фотафакт: у "чорных капальнікаў" забралі кулямёты і дзясяткі гранат
УСК па Мінскай вобласці расследуе крымінальную справу ў адносінах двух "чорных капальнікаў". Гэта — 48-гадовы жыхар Віцебска і 36-гадовы жыхар Мінскага раёна. Працяглы час мужчыны займаліся незаконным пошукам зброі і боепрыпасаў у месцах баёў падчас Другой сусветнай вайны. Знойдзенае яны рамантавалі, аднаўлялі, а пасля прадавалі.
Як паведамляе афіцыйная прадстаўніца УСК па Мінскай вобласці Таццяна Беланог, праваахоўнікі знайшлі ў затрыманых па два пісталеты-кулямёты Дзегцярова і Шпагіна, пісталет-кулямёт МР-40, вінтоўку Мосіна, 23 гранаты Ф-1 і некалькі соцень патронаў. Арсенал адправілі на крыміналістычнае даследаванне.
Затрыманым выставілі абвінавачанне ў незаконным набыцці, захоўванні, перавозцы і рэалізацыі агнястрэльнай зброі і боепрыпасаў, здзейсненых групай асоб па папярэдняй змове (ч. 3 арт. 295 КК). Праваахоўнікі высвятляюць усе эпізоды супрацьпраўнай дзейнасці "чорных капальнікаў". Дарэчы, сёлета УСК па Мінскай вобласці распачало больш за 40 крымінальных спраў аб незаконных дзеяннях у адносінах агнястрэльнай зброі, боепрыпасаў і выбуховых рэчываў.
