Гамяльчук расплаціўся ў маршрутцы купюрай, надрукаванай на прынтары

На 23-гадовага гамельчука пачалі крымінальную справу за выкарыстанне фальшывай купюры для аплаты праезду ў маршрутцы. Пра гэта выданню Belka расказалі ў пракуратуры горада.

Малады чалавек разам з сябрамі гуляў у карты на грошы, але несапраўдныя: яны раздрукавалі на каляровым прынтары некалькі купюр па 50 рублёў з аднолькавым серыйным нумарам.

Пазней хтосьці з кампаніі заўважыў, што з часам купюры зношваюцца і становяцца вельмі падобныя да сапраўдных. Адзін з хлопцаў вырашыў скарыстацца гэтым падабенствам і разлічыўся фальшыўкай у маршрутцы.

Як расказвае старшы памочнік пракурора Гомеля Аляксандр Шапавалаў, гамяльчук разлічваў, што шафёр заняты кіраваннем і не заўважыць фальшывую купюру. І сапраўды, падробку ён знайшоў толькі пры пераліку выручкі пасля змены.

Знайсці падазраванага ўдалося дзякуючы відэакамеры, усталяванай у салоне маршруткі. Неўзабаве хлопца затрымалі.

Яго асудзілі на два гады абмежавання волі без накіравання ў папраўчую ўстанову ("хатняя хімія") і аштрафавалі на 11 тысяч 100 рублёў.