Інтэрпол аб'явіў экс-прэзідэнта Украіны Януковіча ў вышук (фота)
Новыя ўкраінскія ўлады чакалі гэтага з сакавіка мінулага года. Нарэшце спецыяльная камісія Інтэрпола прыняла адпаведнае рашэнне.
Інтэрпол аб'явіў экс-прэзідэнта Украіны Віктара Януковіча ў вышук. Пра гэта 12 студзеня ў Facebook напісаў міністр унутраных спраў Украіны Арсен Авакаў. Ён нагадвае, што ўкраінскія ўлады падалі дакументы ў Інтэрпол яшчэ ў сакавіку 2014-га, аднак рашэнне было прынятае спецыяльнай камісіяй Інтэрпола толькі цяпер.
Інтэрпол таксама аб'явіў у міжнародны вышук сына Януковіча — Аляксандра Віктаравіча, былога прэм'ера Мікалая Азарава і іншых асоб. У выпадку затрымання іх мусяць экстрадаваць ва Украіну.
Нагадаем, Віктар Януковіч уцёк з Украіны ў лютым мінулага года пасля рэвалюцыйных падзей у Кіеве. Ён атрымаў прытулак у Расіі, некалькі разоў праводзіў прэс-канферэнцыі, на якіх называў сябе "дзейным прэзідэнтам Украіны".
