"Каліноўцы" сустрэліся з мітрапалітам Кіеўскім і ўсёй Украіны Епіфаніем

Прадстаўнікі палка Каліноўскага правялі сустрэчу з мітрапалітам Кіеўскім і ўсёй Украіны Епіфаніем, паведамляе прэс-служба палка.

На сустрэчы прысутнічалі намеснік камандзіра палка Вадзім Кабанчук, баец Павел "Дзядзька" Шурмей, прадстаўнік палка Дзмітрый Шчыгельскі і дэпутат Вярхоўнай Рады Багдан Яроменка — прадстаўнік партыі “Слуга Народа” фракцыі “За дэмакратычную Беларусь”.

Падчас сустрэчы, як паведамляецца, абмяркоўваліся наступныя пытанні:

— досвед Украіны ў стварэнні аўтакефальнай царквы і адыходу ад уплыву РПЦ;
— роля гэтага працэсу ў ідэнтычнасці, свабодзе, дэмакратыі, абароназдольнасці і культурным суверэнітэце краіны; актуальнасць усіх гэтых праблем для Беларусі сёння і ў будучыні;
— парушэнне правоў вернікаў і свабоды сумлення ў Беларусі.

Прадстаўнікі палка Каліноўскага выказаліся за безумоўнае захаванне ўсіх правоў вернікаў і стварэнне ўмоваў для рэалізацыі свабоды сумлення ў Беларусі пасля звяржэння дыктатуры Лукашэнкі.

Мітрапаліт Кіеўскі і ўсёй Украіны Епіфаній расказаў пра шлях Украінскай Праваслаўнай Царквы і ўкраінскага грамадства да атрымання Томаса. Таксама ён падзякаваў палку Каліноўскага за дапамогу ў абароне Кіева і адбіцці расійскай агрэсіі.

У палку Каліноўскага кажуць, што цяпер ідуць кансультацыі пра магчымасць падрыхтоўкі беларускіх святароў у навучальных установах Украінскай Праваслаўнай Царквы.