КДБ: Завершанае расследаванне справы Уладзіміра і Казбека Япрынцавых
Завершанае папярэдняе следства па крымінальнай справе Уладзіміра і Казбека Япрынцавых. Пра гэта БЕЛТА ў пятніцу, 15 красавіка, паведаміў начальнік прэс-службы КДБ Дзмітрый Пабяржын. Паводле яго слоў, Япрынцавы знаёмяцца з матэрыяламі крымінальнай справы. Вядома, што ім выставілі абвінавачанне па артыкуле "махлярства" (арт. 209 Крымінальнага кодэксу Беларусі).
Уладзімір Япрынцаў быў намеснікам гендырэктара, саўладальнікам кампаніі "Трайпл", якой кіраваў вядомы беларускі бізнесмен Юрый Чыж (затрыманы КДБ у сакавіку 2016 года). Ён нарадзіўся ў 1961 годзе ў Туркменістане. У Беларусь прыехаў паступаць у інстытут фізкультуры і тут застаўся. У Япрынцава дзве дачкі і сын — Казбек, які таксама праходзіць па справе. На час арышту Уладзімір Япрынцаў быў старшынёй Беларускай федэрацыі дзюдо і Беларускай федэрацыі самба, віцэ-прэзідэнтам Еўрапейскай асацыяцыі самба, першым намеснікам старшыні праўлення ФК "Дынама-Мінск". У мінулым ён — вядомы спартсмен, трохразовы чэмпіён свету і Еўропы па самба, уладальнік Кубка свету, заслужаны трэнер Беларусі. Таксама ён — доктар філасофскіх навук, суаўтар кнігі "Нацыянальная самасвядомасць як інтэгратыўная прыкмета нацыі".
У сакавіку 2016-га старшыня КДБ Валерый Вакульчык распавёў, што намеснік Юрыя Чыжа ў кампаніі "Трайпл" Уладзімір Япрынцаў быў затрыманы летам 2015 года пасля заявы яго кіраўніка. Разам з Чыжом у КДБ тады звярнуліся яго расійскія партнёры, якія заявілі пра супрацьпраўную дзейнасць Япрынцава.
Па адной з версій, Япрынцавых маглі арыштаваць праз праблемную сітуацыю з украінскімі партнёрамі з кампаніі Jaspen Capital Partner. Ім Казбек Япрынцаў і яго партнёры не паставілі дызпаліва, а грошы атрымалі. Гарантам гэтага пагаднення, нібыта, выступаў холдынг "Трайпл".
