“Хацелі манаполію на беларускае войска”: былы баец ПКК раскрытыкаваў кіраўніцтва

30/01/2023 - 11:58

Атмасфера ў палку вельмі цяжкая, лічыць былы баец ПКК Міхасюк / t.me/belwarriors

Атмасфера ў палку вельмі цяжкая, лічыць былы баец ПКК Міхасюк / t.me/belwarriors

Былы баец палка імя Каліноўскага Яўген Міхасюк распавёў, што найбольш вядомае ва Украіне вайсковае фармаванне беларусаў — “калос на гліняных нагах”. Прычын даволі шмат, напрыклад, дрэнны менеджмент, хлусня, гвалт і кумаўство.

Еўрарадыё даведалася ў Яўгена, чаму ён вырашыў казаць пра гэта цяпер і чаму кіраўніцтва палка Кастуся Каліноўскага (ПКК) не хоча будаваць добрыя адносіны са Святланай Ціханоўскай і фондам BYSOL.

Міхасюк лічыць, што важна казаць пра праблемы менавіта цяпер, бо будуюцца вельмі важныя для Беларусі структуры. Калі іх падмурак — хлусня і маніпуляцыі, то яны хутка разваляцца і не будуць эфектыўныя ў патрэбны гістарычны момант.

— Я прыкладна дзесяць месяцаў знаходзіўся ў палку Каліноўскага, спрабаваў размаўляць наўпрост з кіраўніцтвам. Калі гэта не прынесла плёну і не засталося ніякіх опцыяў паўплываць на дзейнае кіраўніцтва, лічу, што публічнасць — гэта не самы горшы варыянт.

Што ж дрэннага ў кіраўніцтве палка?

— Сёння кіраўніцтва дзейнае палка Каліноўскага абрала стратэгію будаваць свой імідж і палітыку на дадзеных, якія не з’яўляюцца праўдай. Назвы, якія маюць стуктурныя адзінкі, дадзеныя, якія даюцца пра ўдзел беларусаў у вайне, у тым ліку пра колькасць, некаторыя моманты выканання баявых задач, гераізацыя некаторых людзей — усё гэта або цалкам не адпавядае рэчаіснасці, або вельмі моцна павялічана.

Міфалагізацыя можа падацца не такой дрэннай, калі проста назіраць за палком. Але гэта прыводзіць да расчаравання тых, хто далучаецца да ПКК, працягвае Яўген.

“Ствараюць уражанне ўнуранага канфлікта”

Да гэтага дадаецца хлусня і маніпуляцыі.

— Гэта стыль камунікацыі ўнутры палка Каліноўскага паміж дзейным кіраўніцтвам і асабовым складам. Прывяду адзін з прыкладаў мінімальнай хлусні. Падчас канфлікту, пасля якога больш за палову людзей з батальёна “Ліцвін” сышла, кіраўніцтва размаўляла з салдатамі з кожным паасобку. І ў іх пытаюць, ці падтрымліваеце вы гэтага чалавека? І яны адказваюць: “Так, падтрымліваем”. Клічуць наступнага і кажуць: “Не, ніхто яго не падтрымлівае”. Яны ствараюць уражанне ўнутранага канфлікту ў падраздзяленні. Каб людзей пасварыць паміж сабой і пасля навязаць нейкае рашэнне.

Такіх прыкладаў багата. Давяраць такім людзям сваё жыццё падчас вайны я асабіста негатовы.

Таксама сярод праблем культ сілы: хто мацнейшы, той і прымае рашэнні, — працягвае суразмоўца.

— Але заўсёды ў нейкі момант знойдзецца чалавек, які будзе мацнейшы за цябе.

“Хацелі манаполію на беларускае войска”: былы баец ПКК раскрытыкаваў кіраўніцтва

Паведамаленні, якія прыйшлі Яўгену ад байцоў пасля таго, як ён выказаўся пра кіраўніцтва ПКК / twitter.com/mihasyukevgen

Ужо былі праблемы, звязаныя з дапамогай палку. Чамусьці кіраўніцтва адмаўлялася працаваць з фондам BYSOL. Нібыта грошы з фондаў ідуць не туды.

Пры гэтым незразумела, што са справаздачнасцю у самога палка.

— Не бачу праблемы выбраць трох журналістаў з трох розных СМІ, якім давярае грамадства, каб яны паглядзелі ўсе гэтыя паперы і справаздачы ПКК, упэўніліся, што там сапраўды ўсё празрыста і напісалі пра гэта.

Гэта, мне здаецца, было б моцным падмуркам для ПКК, каб людзі былі больш упэўненыя ў тым, што там усё празрыста. Цяпер кіраўніцтва ПКК кажа, што любы баец можа прыйсці і паглядзець нашу справаздачу. Давайце шчыра, вы прыходзіце, а там ляжыць пяць тамоў розных аркушаў, рахункаў. Няўжо звычайны баец здольны з гэтым разабрацца, ці супадае там усё? Я думаю, што не. Таму гэта такая маніпуляцыя.

Што тычыцца Стрыжака, то тут будзе адказ вельмі падобны на тую ж сітуацыю з Офісам Ціханоўскай. Людзі [кіраўніцтва ПКК. — Еўрарадыё] ад пачатку хацелі мець манаполію на беларускае войска ва Украіне і не хацелі, каб хтосьці яшчэ займаўся гэтай тэмай. У тым ліку гуманітаркай, інфармацыйнай прасторай. Таму ўсе фінансавыя патокі яны хацелі завязаць на сябе. Гэта было б ім асабіста выгадна, таму што, калі ўсе фінансавыя патокі, уся гуманітарка, усё інфармацыйнае поле цалкам завязаныя на адным, двух, трох людзях, ты цалкам кантралюеш сітуацыю і можаш прасоўваць свае інтарэсы, праводзіць сваю палітыку, не азіраючыся на меркаванне грамадства.

Гэта нагадвае Яўгену сістэму Лукашэнкі.

“Вось гэта сапраўды нацыянальнае войска”

Апошняя праблема — у кіраўніцтва палка няма арыентаванасці на беларушчыну.

— Напачатку вайны мы жылі на базе “Азова”. Гэта вельмі нацыянальна арыентаваная арганізацыя, у якой людзі вельмі патрыятычна ставяцца да таго, што звязана з іх культурай. Яны размаўляюць па-украінску, усе загады па-украінску, у структуры сотнікі, дзесятнікі. Я падумаў — вось гэта сапраўды нацыянальнае войска.

У мяне была надзея, што ў палку Кастуся Каліноўскага мы будзем ствараць нешта кшталту таго. Але адразу сутыкнуўся з тым, што ўсе размаўляюць па-руску, усе дакументы па-руску, загады. І я падышоў да аднаго з кіраўнікоў у той момант. І кажу, што ёсць у мяне прапанова ўсё ж такі па-беларуску ўсё рабіць. На што мне адказалі кшталту “табе разбіць твар”?

Канешне, з часам кіраўніцтва Палка Каліноўскага зразумела, што без беларушчыны будзе вельмі цяжка прасоўваць імідж беларусаў ва Украіне. І яны пачалі спрабаваць размаўляць па-беларуску, вядуць сацыяльныя сеткі па-беларуску. Але, думаю, кіраўнікі палка Каліноўскага не ўсе змогуць адказаць на самыя простыя пытанні пра гістарычны падмурак Беларусі і сказаць некалькі сказаў па-беларуску, не выкарыстоўваючы пры гэтым кожнае другое-трэцяе расійскае слова, — рэзюмуе Яўген.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.