"Маша і Мядзведзь" і кантрацэптывы на аснове антыцелаў: толькі добрыя навіны

У Расіі вынайшлі эканамічны спосаб перапрацоўкі пілавіння, а ў Амерыцы — новы кантрацэптыў на аснове антыцелаў. Украінскі праграміст атрымаў ад Twitter 3500 долараў, давёўшы, што сацсеткі прадузятыя ў дачыненні да цемнаскурых людзей на фотаздымках, а мультсерыял "Маша і Мядзведзь" прызнаны самым папулярным у свеце.  

Пра гэта і не толькі ў аглядзе самых добрых, смешных, а часам абсурдных навін на Еўрарадыё.

3500 долараў ад Twitter за барацьбу з дыскрымінацыяй

Кампанія Twitter заплаціла 3500 долараў украінскаму праграмісту Багдану Кулынычу. Аспірант швейцарскага універсітэце EPFL даказаў, што алгарытмы сацсеткі прадузятыя ў дачыненні да цемнаскурых людзей на фотаздымках.

З дапамогай штучнага інтэлекту хлопец згенераваў здымкі з амаль ідэнтычнымі асобамі людзей, якія адрозніваліся толькі колерам скуры, гендарам, узростам і камплекцыяй.

Украінец не толькі даказаў, што алгарытмы Твітара абразаюць цемнаскурых людзей на фота, але і заўважыў, што яны лепш факусуюцца на больш маладых, стройных і светлых тварах. Кампанія абяцае выправіць памылкі.

Мультсерыял "Маша і Мядзведзь" прызнаны самым папулярным у свеце

Расійскі анімацыйны серыял "Маша і Мядзведзь" стаў лідарам спісу мультымедыйнага кантэнту Parrot Analytics. Пра гэта паведамляецца ў прэс-рэлізе студыі Animaccord.

Міжнароднае даследчае агенцтва склала рэйтынг самых папулярных дзіцячых перадач для дашкольнага ўзросту ў свеце па стане на жнівень 2021 года. 

Вынікі даследаванняў паказалі, што на працягу апошніх двух месяцаў "Маша і Мядзведзь" апярэджвае такія замежныя праграмы, як "Свінка Пэпа", "Вуліца Сезам" і "Шчанюковы патруль".

Мужчына знайшоў даўным-даўно страчаную сям'ю

Герой брытанскага шоу Long Lost Family Леон Партан​ знайшоў родную сям'ю праз 40 гадоў пасля таго, як яго ўсынавілі прыёмныя бацькі.

46-гадовы мужчына распавёў, што любіў прыёмную маці, братоў і сясцёр, але ў яго было даволі цяжкае дзяцінства. Ён заўсёды лічыў, што жыццё было б лепшым, калі б яго не забралі ў сапраўдных бацькоў.

Калі Леону было 11 гадоў, прыёмная маці паказала яму выразку з газеты, якую яна захоўвала з яго маленства. Дзякуючы ёй аўтарам перадачы і ўдалося знайсці сваякоў Партана. 

У матэрыяле гаварылася, што яго біялагічная маці Утэ Дэніелс, а таксама яго трое братоў і сясцёр былі выселеныя з сямейнага дома і некаторы час жылі на вуліцы.

У артыкуле гаворыцца, што маці вельмі баялася таго, што яе сям'я распадзецца пасля высялення. Там жа былі фотаздымкі брата і сясцёр Леона.

Рэдактары праграмы даведаліся, што біялагічная маці брытанца памерла ў 2012 годзе. Праўда, у супрацоўнікаў шоу атрымалася знайсці яго сваякоў са здымкаў. 

Калі мужчына ўпершыню сустрэўся з роднымі братамі і сёстрамі, ён сказаў, што "адчувае сябе выдатна", таму што ўпершыню ў свядомым узросце "абняў крэўнага сваяка".

Знойдзены эканамічны спосаб перапрацоўкі пілавіння

Вяцкія вучоныя распрацавалі малагабарытную і лёгка транспартуемую драбнілку для драбнення пілавіння з наступным фармаваннем іх у паліўныя гранулы. Новае вынаходніцтва вырашыць праблему перапрацоўкі адходаў дрэваперапрацоўчай прамысловасці. 

Да цяперашняга часу адходы прадпрыемстваў дрэваперапрацоўчай вытворчасці ў Расіі не выкарыстоўваюцца, паколькі існуючыя тэхналогіі не дазваляюць здрабняць матэрыялы з малой удзельнай масай. Акрамя таго, устаноўкі маюць занадта вялікія габарыты, што абцяжарвае іх перамяшчэнне да пэўнай вытворчасці. 

Пры гэтым адходы малых дрэваперапрацоўчых вытворчасцей у краіне ацэньваюцца прыкладна ў паўтара мільёна тон за год, таму задача іх перапрацоўкі асабліва актуальная.

Вынайдзены новы кантрацэптыў на аснове антыцелаў

Новы кантрацэптыў на аснове антыцелаў прыдумалі спецыялісты Універсітэта Паўночнай Караліны. 

Навошта ён патрэбны?

Вядома, што ў арганізме некаторых жанчын выпрацоўваюцца антыцелы да сперматазоідаў. Гэта можа прывесці да імуналагічнага бясплоддзя. 

Даследчыкі стварылі новае антыцела. Яно здольнае нейтралізаваць сперматазоіды. Каб праверыць яго эфектыўнасць, навукоўцы ўвялі ў похву авечак, чый рэпрадуктыўны тракт падобны да чалавечага, 333 або 33 мкг антыцелаў альбо фізраствор, а потым дадалі туды сперму добраахвотнікаў.

Праз дзве хвіліны даследчыкі ўзялі ўзоры сперматазоідаў з похвы авечак і атрымалі вынік: антыцелы ў высокай канцэнтрацыі душылі актыўнасць 99,9% сперматазоідаў, а ў нізкай — больш за 90%.

Пакуль, праўда, нельга сказаць, наколькі эфектыўна антыцелы будуць прадухіляць цяжарнасць. Антыген, з якім яны звязваюцца, ёсць толькі ў сперме чалавека і шымпанзэ, а эксперыменты на апошніх у Амерыцы забароненыя. 

Калі ж атрымаецца надзейна даказаць эфектыўнасць, гэта дапаможа стварыць вагінальныя кольцы, або плёнкі, або раствор для ін'екцый, якімі можна будзе карыстацца для абароны ад цяжарнасці.