Мінчанку асудзілі па фота, якія знайшлі ў воблачным сховішчы яе тэлефона
Мінск у 2020-м, ілюстрацыйнае фота / spring96.org
У судзе Маскоўскага раёна Мінска за ўдзел у трох паслявыбарчых Маршах 2020 года асудзілі 49-гадовую бухгалтарку Наталлю Хлызову, паведамляюць праваабаронцы "Вясны". Суд адбыўся яшчэ 6 сакавіка, але вядома пра яго стала толькі цяпер.
Жанчыне выставілі абвінавачанне паводле "народнага" артыкула — ч. 1 арт. 342 Крымінальнага кодэкса (актыўны ўдзел у дзеяннях, якія груба парушаюць грамадскі парадак). Маўляў, падчас акцый пратэсту яна выходзіла на праезную частку дарогі і "блакавала і заступала шлях транспартным сродкам".
Падставай для суда сталі фатаграфіі, якія мінчанка рабіла на тэлефон і пакінула ў воблачным сховішчы. Міліцыянты знайшлі сем фатаздымкаў, на якіх былі Наталля, яе муж ды іншыя людзі.
Да суда Наталля была пад закладам у памеры 8000 рублёў.
Улічваючы, што жанчына мае на ўтрыманні дзіцё, суддзя Юлія Варакса прызначыла ёй тры гады "хатняй хіміі".
