Міністр абароны Украіны звольніць 40% ведамства пасля дэтэктара хлусні

40% кіраўнікоў міністэрства абароны не прайшлі праверку на дэтэктары хлусні. Новы міністр абароны Сцяпан Палтарак у інтэрв’ю ўкраінскаму 5 каналу абяцае звольніць гэтых людзей. Па словах міністра, пад праверку трапілі 35 кіраўнікоў ведамства, 40% з іх — гэта 14 чалавек.

“У мяне няма іншага выйсця. Таму што людзі, якія не прымаюць своечасова рашэнні, людзі, якія працавалі ўжо 30-40 гадоў і нічога не змяняюць у сваёй працы — у іх, дарэчы, перспектыва невялікая. У іх увогуле вялікія праблемы з пошукам працы. Так, як была пабудаваная праца ў міністэрстве, — гэта так сістэма не працуе”, — кажа міністр.

Дэтэктар хлусні (паліграф) — прылада, якая ацэньвае праўдзівасць інфармацыі праз інструментальнае даследаванне дыхання, сардэчна-сасудзістай актыўнасці чалавека.

Прэс-сакратар міністра абароны Украіны крыху раскрывае Еўрарадыё падрабязнасці гэтай праверкі:

“Ужо некалькі дэпартаментаў скарочаныя, некалькі аб’яднаныя ў адно. І кожны кіраўнік дэпартамента перапрызначаецца на пасаду, а перад прызначэннем праходзіць цэлы комплекс спецыяльных праверак і выпрабаванняў, у тым ліку і паліграф. Потым па выніках гэтых праверак збіраецца спецыяльная камісія”.

Прадстаўніца мінскай арганізацыі, якая аказвае паслугі праверкі на паліграфе, кажа, што гэтую прыладу часта выкарыстоўваць падчас антыкарупцыйных мерапрыемстваў і для простых праверак супрацоўнікаў. У Беларусі такімі паслугамі карыстаецца нямала арганізацыяў, у тым ліку і дзяржаўныя ведамствы.

“Мы ніколі не называем нашых заказчыкаў, інфармацыя застаецца толькі ў нас. Але нашымі паслугамі карыстаюцца і вялікія прадпрыемствы і вельмі буйныя, нават тыя, якія ва ўсіх на слыху”, — паведамляе супрацоўніца.

Па яе словах, некаторыя фірмы набіраюць сваіх супрацоўнікаў толькі праз тэст на паліграфе, іншыя праводзяць тэставанне на хлусню пастаянна — раз на паўгода. Праверка чалавека ў сярэднім займае 1,5 гадзіны і каштуе каля мільёна. Набыць такую прыладу нятанна — каштуе як добры невялікі аўтамабіль.