Мітрапаліт Веніямін: веруючыя не могуць быць абыякавымі да трывожных падзей
Мітрапаліт Мінскі і Заслаўскі Веніямін, Патрыяршы экзарх усяе Беларусі, звярнуўся да вернікаў з віншаваннем з нагоды Нараджэння Хрыстовага. Праваслаўныя беларусы адзначаюць гэтае свята заўтра, 7 студзеня.
У сваім віншаванні кіраўнік Беларускай праваслаўнай царквы згадаў падзеі 2020 года.
"Ён быў вельмі няпросты для многіх людзей, народаў і дзяржаў, для чалавецтва ў цэлым. Пандэмія раней невядомай хваробы і звязаныя з ёй абмежаванні і пагрозы; напружанасць у шэрагу краін і рэгіёнаў свету; страта аднадумства і адзінства сярод Памесных Праваслаўных Цэркваў, нарэшце, падзел у нашым грамадстве, што ўзнік на палітычнай глебе, — усё гэта пазбаўляе людзей пачуцця бяспекі, стабільнасці і спакою, якое ўжо стала звыклым і штодзённым для нас. Многія адчуваюць разгубленасць і страх перад будучыняй, забываючы пра Айцоўскую любоў Божую да ўсіх нас і пра Яго спасіцельнае апекаванне", — гаворыцца ў віншаванні мітрапаліта.
Ён заклікае не тужыць, бо свет перажываў значна больш драматычныя і небяспечныя часы. Падзеі мінулага года, на думку кіраўніка БПЦ, сур'ёзная падстава задумацца пра нашае стаўленне да Бога і блізкіх.
"Веруючыя людзі не могуць заставацца абыякавымі да трывожных падзей, што адбываюцца ў свеце, і перш за ўсё — у сваёй Айчыне. Але мы таксама не павінны забываць пра пакорнамудрасць і малітоўную развагу ва ўсякай справе і ўсякім слове. Будзем слухаць сваё сэрца і не дазваляць яму апускацца ў бездань перажыванняў і страсцей, каб не страціць каштоўны ўнутраны мір душы, які даруецца звыш тым, хто шукае волю Божую", — заяўляе мітрапаліт Веніямін.
Ён адзначае, што ў большасці выпадкаў чалавек не можа ўплываць на працэсы, якія ахапілі сённяшні свет. Таму заклікае: "Будзем рабіць тое добрае, што ў нашых сілах, а ў астатнім даверымся волі Божай".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
